ബെംഗളൂരു: പഴയ എയർപോർട്ടിന് സമീപം വിൻഡ് ടണൽ റോഡിൽ വർഷങ്ങളായി യാത്രാതടസ്സവും ദുർഗന്ധവും സൃഷ്ടിച്ചിരുന്ന പ്രധാന മാലിന്യക്കൂമ്പാരം ഒടുവിൽ നീക്കം ചെയ്തു. ബെല്ലന്തൂർ ഭാഗത്തേക്കും മറ്റ് സമീപ പ്രദേശങ്ങളിലേക്കും ദിവസേന യാത്ര ചെയ്യുന്ന ആയിരക്കണക്കിന് ആളുകൾക്ക് വലിയ ആശ്വാസമാകുന്നതാണ് ഈ നടപടി.
പൗരസമൂഹത്തിന്റെ കൂട്ടായ്മയും ഗ്രേറ്റർ ബെംഗളൂരു അതോറിറ്റിയും (ജി.ബി.എ) സംയുക്തമായാണ് ഇവിടെ ശുചീകരണ പ്രവർത്തനങ്ങൾ നടത്തിയത്. മാലിന്യങ്ങൾ പൂർണ്ണമായി നീക്കം ചെയ്തതിനൊപ്പം തകർന്ന നടപ്പാതകൾ നവീകരിക്കുകയും ചെയ്തു. കൂടാതെ റോഡിന്റെ വശങ്ങളിലെ ഭിന്നകളിൽ ഇന്ത്യൻ ദേശീയ പതാകയുടെ നിറവും എച്ച്.എ.എല്ലിന്റെ (HAL) തേജസ് യുദ്ധവിമാനത്തിന്റെ ചിത്രങ്ങളും വരച്ച് മനോഹരമാക്കിയിട്ടുണ്ട്. തെരുവ് വിളക്കുകൾ സ്ഥാപിച്ചതിനൊപ്പം വീണ്ടും മാലിന്യം തള്ളുന്നത് തടയാൻ ഔദ്യോഗിക മാർഷലുകളെയും നിയോഗിച്ചിട്ടുണ്ട്.
ബെംഗളൂരു സെൻട്രൽ സിറ്റി കോർപ്പറേഷന്റെയും ബെംഗളൂരു ഈസ്റ്റ് സിറ്റി കോർപ്പറേഷന്റെയും അതിർത്തിയിൽ വരുന്ന ഈ പ്രദേശം വർഷങ്ങളായി അധികൃതരുടെ ശ്രദ്ധയിൽപ്പെടാതെ കിടക്കുകയായിരുന്നു. സാമൂഹിക മാധ്യമമായ എക്സ് (X) വഴി യാത്രക്കാർ ഈ പ്രശ്നം അധികൃതരുടെ ശ്രദ്ധയിൽപ്പെടുത്തിയതിനെ തുടർന്നാണ് അരുൺ പൈ, വൈഭവ് സൂര്യവംശി എന്നിവരുടെ നേതൃത്വത്തിലുള്ള ‘ദി അഗ്ലി ഇന്ത്യൻ’ (The Ugly Indian) പ്രവർത്തകർ ശുചീകരണ പ്രവർത്തനങ്ങൾ ഏറ്റെടുത്തത്. ജെ.സി.ബി ഉൾപ്പെടെയുള്ള സഹായങ്ങൾ ജി.ബി.എ നൽകി.
കോർപ്പറേഷന് ആവശ്യമായ സൗകര്യങ്ങൾ ഇല്ലാതിരുന്ന ഇടത്താണ് തങ്ങൾ ഇടപെട്ടതെന്നും സൗന്ദര്യവൽക്കരണവും തെരുവ് വിളക്കുകൾ സ്ഥാപിക്കുന്നതും ഉൾപ്പെടെയുള്ള കാര്യങ്ങൾ ചെയ്തതായും അരുൺ പൈ മാധ്യമങ്ങളോട് പറഞ്ഞു. വെളിച്ചം ഉറപ്പാക്കാൻ എച്ച്.എ.എല്ലിന്റെ സഹായവും ലഭിച്ചതായി അദ്ദേഹം കൂട്ടിച്ചേർത്തു. താൻ സ്വന്തം വീടായി കാണുന്ന നഗരത്തിന്റെ ഈ അവസ്ഥ തന്നെ ഏറെ ദുഃഖിപ്പിച്ചിരുന്നുവെന്നും ‘Iknowaguy.com’ എന്ന വെബ്‌സൈറ്റ് വഴി ബന്ധപ്പെട്ട ജി.ബി.എ ഉദ്യോഗസ്ഥരെ കണ്ട് ഈ മാറ്റം യാഥാർത്ഥ്യമാക്കാൻ സാധിച്ചതിൽ സന്തോഷമുണ്ടെന്നും വൈഭവ് സൂര്യവംശി വ്യക്തമാക്കി.
പൊതുസ്ഥലങ്ങൾ സംരക്ഷിക്കുന്നതിൽ ജനങ്ങളുടെ കൂടി പങ്കാളിത്തം ഉറപ്പാക്കുന്നതിനായി കൂടുതൽ സന്നദ്ധ സംഘടനകളെയും പൊതുപ്രവർത്തകരെയും ഒപ്പം കൂട്ടുന്നുണ്ടെന്ന് സെൻട്രൽ സിറ്റി കോർപ്പറേഷൻ കമ്മീഷണർ ജി. ജഗദീഷ് പറഞ്ഞു. ശുചീകരണത്തിന് ശേഷം ഇതുവരെ ഇവിടെ മാലിന്യം തള്ളിയതായി റിപ്പോർട്ടുകളൊന്നും വന്നിട്ടില്ലെന്നും, പ്രദേശം വൃത്തിയായി സൂക്ഷിക്കുന്നുണ്ടെന്ന് ഉറപ്പാക്കാൻ പത്ത് ദിവസത്തേക്ക് കൂടി കർശന നിരീക്ഷണം തുടരുമെന്നും അദ്ദേഹം കൂട്ടിച്ചേർത്തു.
